Nai hrawng Tedim peng chung ah CNA, CDF-Hualngoram le CDF-Zanngiatram he aa kap lengmangmi Zomi Revolutionary Army (ZRA) nih nihin April 2 ah a sakhaan pakhat an chuahtak, tiah CNF chimnak nawlngei Salai Htet Ni nih a chim.
“Kanmah (CNA) ralkap bu No. 4 hmunram chung ah a ummi ZRA hi SAC ralhrang he naihniam in a ummi an si i, nizan ah kan i kap i nihin ah an sakhaan pakhat an chuahtak. An sakhan hi kan la lo nain anmah tein an chuahtakmi a si,” tiah a chim.
March 23 thawk in atu tiang ah ZRA le CNA, CDF karlak ah i kahnak voi 3 tiang a um cang i ZRA lei in ralkap 2 an thi, meithal 2 zong CNA le CDF nih an lakpiak khawh hna.
ZRA pawl an hmanmi MA-3 meithal le kuanfang pawl hi SAC ralhrang nih an hmanmi lawngte a si, tiah Salai Htet Ni nih cun a chim chap.
Credit – TNA
