Thantlang khua Bungkung pawng i SAC ralhrang sakhan cu CNA, CDF- Thantlang , CDF-Zophei fonh nih nihin August 14 zinglei suimilaam 5 hrawng ah an kah i an lak khawh.
Ralhraang thi zat theihfian a si lo nain a nung in 2 tlaih an si. An hriamnam 6 lak piak an si. CDF Thantlang in minung pakhat le CDF Zophei in minung 2 nih miphun le ram caah an nunnak an pek.
A nunnak a liammi CDF pasal tha pathum hna cu Salai Lai Hnin (CDF-Zophei), Salai Tin Peng Lian (CDF-Zophei) le Salai Ram Hei Lian (CDF-Thantlang) hna hi an si.
Ralhraang umnak lak a si hnu ah ralhraang bomb kahthlorh in an kah hlei ah le Khuafo khua le Loklung khua ah bomb an thlak caah Loklung khua inn 4 an rawk, khuami pakhat hliam a tuar.
Khuafo khua ah Biakinn le Pastor inn an rawk. Khuafo khua hi luancia Hniang 31 ah ralhraang nih bomb a rak thlak i khuami 8 an nunnak a rak liam i, minung 11 an tuar hlei ah khuami inn 13 a rak kaang.
Ralhraang ruang ah hliamtuar le rawkral mi hna a nung Pathian nih in hnem hram ko hna seh tiah CNF nih cathanh an chuah.
