Sagaing ramthen, Chawng peng ah mipi ralkap nih kumtling lo nu 4 an tlaihrem hna i an thahmi hna le tlangval 3 zong an thahmi hna kong he pehtlai in NUG nih ahmaanmi a si ko tiah an langhte
Asinain, sualnak a tuahtu Chawng-U peng PDF pawl cu nihin ni tiang ah dantatnak an tuah hna lo caah mipi an lungtling lo ngaingai.
Aluancia thla 9 ah khan Chawng-U PDF nih kum 15 in kum 20 karlak a simi nu 4 le pa 3 cu dalan tiah an ti hna i an rak tlaih hna.
Nu 4 cu an tlaihrem hna hnu ah an thah hna. Pa 3 zong an hrem hna i an thah hna. An ruak cu vawlei khor chung ah an phum hna.
Sualnak a tuahtu hna lak ah hin Chawng-U PDF hruaitu le a kut tang ralkap 3 an i tel hna.
Chawng-U peng mipi uknak lei zung nih biaceih i dantat ding in NUG nih tuanvo a pek hna nain atu tiang an tlaih hna lo caah mipi an thinhunnak hi a si.
Ralram ah sualnak a tuahtu paohpaoh cu PDF an si zong ah ralram upadi ning in fak piin dan kan dat hna lai tiah NUG nih cun a chim.
