Nihin Dec. 28 zinglei ah PDF nih Yephyo peng ah SAC ralhrang motor pawl bomb an puah hnawh i cuka bomb puahnak hmun ah cun kum 20 a simi ngaktah nute a nunnak a rak liam.
Yephyo peng Ngyinhtwe khuate le Zikyah khuate karlak ah PDF nih SAC ralhrang motor tlar cu bomb in voi 5 hrawng an puah hnawh hna.
Bomb puahnak a chuah dih lecangka in meithal kah thawngpang pehzul in a thang. Bomb puahnak le meithal kah thawngpanwg a daih hnu ah khuami nih an vung zoh cun nungak nute cu a motorcycle he lam cung ah a rak ril ko.
Hi nute hi Zikyah khuami a si. Ma Pah Eh Phyo tiah an auhmi a si i, a nulepa nih an thihtak cang caah ngapih le eidin tuktak zuar in a paw aa cawmmia.
Tu zinglei zong hi Ngyinhtwe khuate ah ngapih va pek ding in motorcycle in a kal lio ah mah bantuk vanchiatnak a ton hi a si.
Khuami nih an chim ning ah cun Ma Pan Eh Phyo hi a lu a parh dih. Cucaah, bomb nih a puah hnawhmi a si kho, SAC ralhrang motor nih a pah i a rialmi zong a si kho, tiah an zumh.
