NLD chungkhar kum 6 ngakchiate telh in minung 8 a thattu hna lak ah Pyosawhti ralhrang pakhat cu a nung bak in an tlaih khawh cang.
January 14 ah khan Sagaing ramthen, Kanbalu peng, Ngamyawng khuate ah a ummi NLD chungkhar minung 8 cu Pyosawhti 30 hrawng nih an rak thah hna.
Thah a tongmi hna hi NLD zung ah a ummi U Kyaw Naing te chungkhar an si. An chungkhar dih lak in an thah hna.
Ngamyawng khuate hi USDP khua a si. NLD chungkhar minung 8 thah a tongmi hna lak ah kum 6 ngakchia te telh in kum 15 tang ngakchia 3 an i tel. Upa minung 5 an si.
U Kyaw Naing te chungkhar a thattu ah aa telmi mah pa hi Kanbalu peng khuate pakhat ah PDF nih January 18 ah an tlaih.
NUG kut ah an ap i upadi ning in dantatnak aa huah ko lai.
