Sagaing ramthen, Ye-U peng chung ah a ummi kum 120 leng a upami Khrihfa biakinn cu nizaan January 14 le nihin January 15 ah SAC ralhrang nih ciam lak in an khangh, tiah Mizzima nih an tial.
Biakinn an khanghmi hi Ye-U peng, Chanthar khua ah a ummi a si. Cu khua ah a ummi Buddhist sianginnpi zong SAC ralhrang nih an ngan lo — an khangh dih ve pin ah Buddhist milem pawl zong SAC ralhrang nih zohdawh lo ngai in an pemh an virh dih hna.
Khuami pakhat nih, “Nihin zing ah biakinn telh in inn vialte an khangh dih. Atutan hi a voi 4nk kan khua an khangh a si. Inn 600 leng an ciam dih cang,” tiah a chim.
Biakinn le Buddhist sianginn telh in khuachung inn vialte a khaangtu hi SAC ralhrang le an hnuzul Pyosawhti ralhrang pawl an si, tiah khuami nih an chim.
Chanthar khua hi kan hnu July 2021 thawk in khan SAC ralhrang nih an rak khangh lengmang cang i, atu a voi 4nk an khangh ah hin cun khuachung in vialte an ciam dih cang, tiah khuami nih Western News sin ah an chim.
