Kawl miphun pawl nih an ngeihmi khuachia lam phun khat “37 khuachia lam” timi a thih lo nakhnga kilkawi ding in SAC ralhrang nih upadi an suai cuahmah tiah theih a si hoi.
Upadi hrimhrim in kilkamh ding in an timhmi Kawl lam hi phun 3 an si. “37 khuachia lam,” “Nungakno lam,” le “Khuavang lam” timi phun 3 hi an i tel.
Hi Kawl lam phun 3 hi National Level bak in nunphun lei upadi in kilven ding in timhtuahnak an ngeih cu a si.
Kawlpa pakhat nih cun, “SAC ralhrang hi mipi ahohmanh nih an dirkamh lo tik ah khuachia khuavang lei (Doih) a thiam an timi minung pawl milhtlorh a timh hna i a si ko,” tiah a chim.
December 5 ah khan SAC ralhrang kut tang ah a ummi Myanmar ram biaknak le nunphung vuanci zung timhtuahnak in mithat lainawng luzik Min Aung Hlaing nih Kawl khuachia khuavang lei (Doih) thiam an timi pawl a ton hna ti a si.
Cu tonnak ah cun Kawl khuachia lam kilven ding in mithat lainawng luzik Min Aung Hlaing nih a chimh hna hi a si.
“Abiapimi rian tuah lem tung loin a herh huaha lomi kong ah mi va fak le va milhtlorh len in an i za ko hen hi,” tiah a cunglei Kawlpa nih nautat ngaiin a chim.
